Если у вас возникают какие-то проблемы с сайтом, используйте адрес http://photoclubs.ru Проблем быть не должно. 

Есть желание помочь сайту материально? Сделайте перевод на 4817760231077102 сбер.Любая сумма будет полезна.

+524 RSS-лента RSS-лента

Блог Ирины.

Автор блога: Ирина
Все рубрики
СВЯТОЙ ВОИН МУЧЕНИК МЕРКУРИЙ СМОЛЕНСКИЙ.


Тропарь:

Возсия́в, я́ко звезда́ многосве́тлая, в собо́рней це́ркви пред пречи́стым и чудотво́рным о́бразом Пречи́стей Богоро́дицы, за Ню́же и за град Смоле́нск пострада́, многоко́зненнаго и богоме́рзкаго царя́ Баты́я устраши́, и си́льнаго исполи́на победи́, и лю́ди удиви́, ду́шу свою́, многострада́льне Мерку́рие, за благоче́стие положи́, я́ко Заха́риина и А́велева я́сно вопие́т твоя́ кровь ко Го́споду. И ны́не моли́ся за ду́ши на́ша.

Кондак:

Яви́ся во бране́х непобеди́мь во́ин, от ри́млян ро́дом, сыновство́ име́ гра́да Смоле́нска, я́ко бо сих ра́ди нарече́ся, я́ко от Богоро́дицы страж кре́пок посла́ся гра́ду, пе́сньми Мерку́рия ублажи́м, пра́зднующе ве́село па́мять его́, я́ко да изба́вит град наш от беды́ ра́тник.
СВЯТОЙ БЛАГОВЕРНЫЙ КНЯЗЬ МИХАИЛ ТВЕРСКОЙ.


Тропарь:

Возвы́сив ум твой к Бо́гу, и жития́ со А́нгелы возжеле́л еси́, тле́нную сла́ву земну́ю оста́вил еси́, блаже́нне, и положи́л еси́ ду́шу твою́ за лю́ди твоя́, воспpия́л еси́ вене́ц пpоти́ву тpудо́в твои́х, Богому́дpе Михаи́ле, моли́ Хpиста́ Бо́га о чту́щих любо́вию святу́ю па́мять твою́.

Кондак:

Вы́шних ищя́ и земну́ю сла́ву презре́в, Це́рковь Бо́жию обагри́л еси́ твое́ю кро́вию, за Ню́же и пострада́л еси́, свя́те Михаи́ле, заколе́ние непра́ведное прие́м веселя́ся. Те́мже со А́нгелы предстоя́ Христу́ Бо́гу, моли́ непреста́нно за вся ны.

Молитва:

О святы́й кня́же Михаи́ле! Испроси́ нам, раба́м Бо́жиим (имена), у Го́спода Бо́га предста́тельством твои́м мир, здра́вие, долгоде́нствие и во всем благоспе́шество. Бу́ди нам помо́щник вся, я́же ко спасе́нию и по́льзе на́шей, восприя́ти; охраня́й нас от искуше́ний и напа́стей, во вре́менней жи́зни приходя́щих, и не лиши́ нас хода́тайства твоего́ ко Христу́ Бо́гу, во е́же получи́ти нам прегреше́ний проще́ние и сподо́битися Небе́снаго селе́ния со избра́нными Его́, я́ко да и в сем сла́вится пречестно́е и великоле́пое и́мя Его́ во ве́ки веко́в. Ами́нь.

Величание:

Велича́ем тя, благове́рный кня́же Михаи́ле, и чтим святу́ю па́мять твою́, и́же за Христа́ кровь свою́ излия́л еси́, и ны́не мо́лиши за нас Христа́, Бо́га на́шего.
СВЯЩЕННОМУЧЕНИК ФИЛУМЕН СВЯТОГРОБЕЦ.


Тропарь:

Де́монов победи́телю, те́мныя си́лы разори́телю, смире́нием унасле́довавый зе́млю, на Небесе́х ца́рствуеши; священному́чениче Филуме́не, моли́ Милосе́рдаго Бо́га на́шего спасти́ ду́ши на́ша.

Кондак:

Священному́чеников новосия́нную звезду́, у студенца́ возше́дшую Самаряны́ни и облиста́вшую Це́рковь Христо́ву целому́дрием и страда́нием, ны́не воспои́м, я́ко а́гнца, за ве́ру закла́ннаго, любо́вию вопию́ще: ра́дуйся, блаже́нне Филуме́не.
СВЯТОЙ ВОИН ВЕЛИКОМУЧЕНИК МИНА.


Тропарь:

Я́ко Безпло́тным собесе́дника и страстоте́рпцем единовсе́льника, соше́дшеся ве́рою, Ми́но, восхваля́ем тя, ми́ра ми́рови испроси́ и душа́м на́шим ве́лия ми́лости.

Кондак:

Во́инства исхити́ привре́меннаго и нетле́ннаго показа́ тя Небе́снаго о́бщника, страстоте́рпче Ми́но, Христо́с, Бог наш, И́же му́чеников нетле́нный вене́ц.

Молитва:

О, страстоте́рпче святы́й му́чениче Ми́но! Взира́юще на ико́ну твою́ и помина́юще цельбы́, тобо́ю подава́емые всем, с ве́рою и благогове́инством к тебе́ притека́ющих, припа́даем ти и, прекло́нше коле́на серде́ц на́ших, от всея́ души́ на́шея мо́лим тя, бу́ди нам хода́тай пред Го́сподом и Спа́сом на́шим Иису́сом Христо́м о не́мощех на́ших, сопу́тствуй и утеша́й нас во вре́мя скорбе́й на́ших, да́руя нам па́мять о гресе́х на́ших, помога́й в напа́стех и треволне́ниях ми́ра сего́, и во всех бедах, в сей юдо́ли плаче́вней нас постига́ющих. Ами́нь.
СВЯТОЙ БЛАЖЕННЫЙ МАКСИМ, ХРИСТА РАДИ ЮРОДИВЫЙ, МОСКОВСКИЙ ЧУДОТВОРЕЦ.


Тропарь:

Нагото́ю теле́сною и теpпе́нием обнажи́л еси́ вpа́жия кова́pствия, облича́я неподо́бное его́ дея́ние, зе́льне стpажда́ со́лнечный ваp и ну́ждныя вели́кия сту́дени, мpа́за и огня́ не чул еси́, Бо́жиею по́мощию покpыва́емь, Макси́ме пpему́дpе, о ве́pою твоpя́щих па́мять твою́ че́стно, и усе́pдно пpитека́ющих к моще́м твои́м, моли́ изба́витися от бед и паде́ния избежа́ти.

Кондак:

Вы́шния красоты́ жела́я, ни́жния сла́дости и теле́сная одея́ния в ничто́же вмени́л еси́, и нестяжа́ние па́че су́етнаго ми́ра возлюби́л еси́. А́нгельское житие́ проходя́, сконча́лся еси́, блаже́нне Макси́ме: с ни́миже Христа́ моли́ непреста́нноо всех нас.

Молитва:

О уго́дниче Бо́жий, блаже́нне Макси́ме! Помоли́ся Го́споду Бо́гу о нас, рабе́х Бо́жиих (имена), к земли́ приве́рженных, да обрати́т Госпо́дь на́ша мы́сли и жела́ния к Небе́сным и да укрепи́т бу́дущих нетле́нных сокро́вищ жела́ти, да пода́ст нам си́лу к побежде́нию страсте́й, мы́слей и жела́ний грехо́вных, да плени́т наш ум в послуша́ние ве́ры, да изба́вит от высокоу́мия, суему́дрия и му́дрость духо́вную нам да́рует: та́же окамене́нная сердца́ на́ша слеза́ми умиле́ния о гресе́х сокруше́ния да раствори́т и да согре́ет я́ к на́шему Созда́телю любо́вию и братолю́бием ко бли́жним на́шим. Блаже́нне Макси́ме, принеси́ ко Го́споду моли́тву о нас, я́ко да не по грехо́м на́шим возда́ст нам, ниже́ по беззако́нием на́шим нака́жет нас, но да проба́вит ми́лость Свою́ на нас, от вся́ких нужд, бед, напа́стей, скорбе́й и боле́зней избавля́я, и и́миже весть судьба́ми да наста́вит нас на путь спасе́ния, и да сподо́бит нас христиа́нскую кончи́ну неболе́знену, непосты́дну и ми́рну прия́ти и Небе́снаго Ца́рствия насле́дие получи́ти со все́ми святы́ми во ве́ки веко́в. Ами́нь.
СВЯТАЯ ПРЕПОДОБНАЯ ФЕОКТИСТА ПАРОССКАЯ.
ИКОНА БОЖИЕЙ МАТЕРИ "ВЗЫГРАНИЕ" (УГРЕШСКАЯ).


Тропарь:

Радостию взыграшася сердца наша, во обители Угрешстей образ Твой, Богородице, чтущих. Имже даруй душам нашим умиление, помыслом и деянием исправление. От всякия беды и напасти нас спасай поющих Ти: слава всеблагому покрову Твоему, слава заступлению Твоему, слава милости Твоей, Едина Всепетая.

Кондак:

Не имамы иныя помощи, не имамы иные надежды, разве Тебе, Владычице. Ты нам помози, на Тебе надеемся и Тобою хвалимся, Твои бо есмы рабы, да не постыдимся.

Величание:

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.
ПОМЕСТНЫЙ СОБОР РУССКОЙ ПРАВОСЛАВНОЙ ЦЕРКВИ 1917 - 1918 ГОДОВ.


Тропарь:

Днесь благода́ть Свята́го Ду́ха нас собра́, просла́вити отцы́ Собо́ра Це́ркве Ру́сския с Первосвяти́телем Моско́вским Ти́хоном, и́же ве́рныя лю́ди земли́ на́шея на по́двиг испове́дания пра́выя ве́ры благослови́ша и страда́нии свои́ми Це́рковь на́шу просла́виша.

Кондак:

Гоне́ния и страда́ния да́же до сме́рти претерпева́юще и правосла́внаго Ца́рства Ру́сскаго разоре́ние облича́юще, отцы́ Собо́ра Це́ркве на́шея к покая́нию ча́да ве́рная призыва́ют и стоя́ти тве́рдо за ве́ру Христо́ву благословля́ют.

Молитва:

О, святи́и уго́дницы Бо́жии, со́нма но́вых му́чеников и испове́дников Це́ркве Ру́сския прича́стницы, на Собо́ре Це́ркве Ру́сския в годи́ну ско́рби до́бре потруди́вшиися и му́жески за ве́ру Христо́ву в ле́та гоне́ния лю́таго пострада́вшии! Помина́юще труды́ на ни́ве Бо́жией, ва́ми подъя́тыя, и по́двиги во страда́нии за ве́ру сверше́нныя, славосло́вим доброде́тели ва́ша, воспева́ем братолю́бие, прославля́ем любо́вь ко Спаси́телю Христу́ и Це́ркви Его́ Святе́й, и, я́ко ча́да ва́ша по ду́ху, мо́лим: научи́те нас ра́зум ева́нгельский приле́жне стяжа́ти, на вся́кое де́ло благо́е потре́бен, помози́те во испыта́ниих кре́пость ве́ры име́ти, сподо́бите нас насле́дники по́двига ва́шего бы́ти, да неосужде́нно Ца́рствия Бо́жия дости́гнем, иде́же ку́пно с ва́ми просла́вим Тро́ицу Единосу́щную во ве́ки веко́в. Ами́нь.

Величание:

Велича́ем вас, святи́и отцы́ Собо́ра Це́ркве Ру́сския, чтим и честна́я страда́ния ва́ша, я́же за Христа́ претерпе́ли есте́.

Ино величание:

Велича́ем вас, святи́телю о́тче Ти́хоне и святи́и отцы́ Собо́ра Це́ркве Ру́сския, и чтим святу́ю па́мять ва́шу, вы бо мо́лите за нас Христа́ Бо́га на́шего.
СВЯТОЙ ПРЕПОДОБНЫЙ ИОАННИКИЙ ВЕЛИКИЙ.


Тропарь:

Сле́з твои́х тече́ньми пусты́ни безпло́дное возде́лал еси́, и и́же из глубины́ воздыха́ньми во сто трудо́в уплодоноси́л еси́, и был еси́ свети́льник вселе́нней, сия́я чудесы́, Иоанни́кие о́тче наш: моли́ Христа́ Бо́га, спасти́ся душа́м на́шим.

Кондак:

Звезда́ яви́лся еси́ всесве́тлая, в ми́ре просвеща́яй, и су́щия во мра́це страсте́й облистава́яй: врач же крепча́йший яви́лся еси́, но я́ко прия́л еси́ благода́ть исцеле́ний, прося́щим тя пода́ждь исцеле́ние, да зове́м: ра́дуйся, о́тче Иоанни́кие.
СВЯТАЯ ПРЕПОДОБНОИСПОВЕДНИЦА МАТРОНА ДИВЕЕВСКАЯ (ВЛАСОВА).


Тропарь:

Ско́рби, гоне́ния, боле́зни мно́гия в годи́ну лю́тых испыта́ний претерпе́вшая и ве́рою тве́рдою пе́рвым му́чеником христиа́нским уподобившися, преподобноисповеднице Матро́но, моли́ся ко Го́споду о спасе́нии ду́ш на́ших.

Кондак:

Дне́сь проро́чество преподо́бнаго Серафи́ма испо́лнися: мно́жество новому́ченик Престо́лу Бо́жию со А́нгелы предстои́т, с ни́миже и преподобноисповедница Матро́на в Дивееве Небе́снем мо́лится непреста́нно о земно́м Оте́честве свое́м.

Величание:

Ублажа́ем тя, преподобноисповеднице ма́ти Матро́но, и чтим святу́ю па́мять твою́, ты бо мо́лиши о нас Христа́ Бо́га на́шего.